Navratri:મહિલા સુરક્ષા માટે તૈનાત અભયમ,181 મહિલા હેલ્પ લાઇન

રાજ્ય સરકાર દ્વારા મહિલાઓને મદદ, માર્ગદર્શન અને બચાવ માટે અભિનવ હેલ્પ લાઇન

181 મહિલા હેલ્પલાઇન 24*7 નિશુલ્ક સેવાઓ આપી રહી છે

આગામી નવરાત્રિ પર્વ દરમિયાન ગરબા સ્થળે મોટી સંખ્યામાં મહિલાઓ અને યુવતીઓ ગરબા સ્થળે આવતાં હોય છે ત્યારે તેમને કોઈ મદદની જરુર પડે તે માટે અભયમ રેસ્કયુ ટીમ મદદ માટે તૈનાત કરવામાં આવી છે જે ગરબાના સ્થળે ફરજ બજાવશે અને કોઈ અનિચ્છનિય બનાવ બને નહી તે માટે રાત્રે બે ક્લાક સુઘી પેટ્રોલિંગ પણ કરશે.
અભયમ રેસ્ક્યુ ટીમમાં મહિલા કાઉન્સેલર, મહિલા પોલીસ અને પાયલોટ સેવાઓ પહોચાડવા માટે સજજ કરવામા આવી છે આમ રાજ્યની મહિલાઓને સુરક્ષિત હોવાનો અહેસાસ થશે અને નિર્ભય રીતે ગરબાની મઝા માણી શકશે. મહિલાઓ તકેદારીના ભાગરૂપે પરિચિત ગ્રૂપ સાથે રહેવા, નિર્ધારિત સમયમાં ઘરે પાછા ફરવા, એકાંત જગ્યા, રસ્તો કે શોર્ટ ક્ટ અપનાવવો નહી, અજાણી વ્યક્તિ પાસે લિફ્ટ લેવી નહીં, ચા નાસ્તો કે કોલ્ડ ડ્રીંક લેવાનું ટાળવું તેમજ અજાણી વ્યક્તિઓને મોબાઈલ નંબર આપવો નહીં વગેરે મુદ્દાઓને અનુસરવા 181 ટીમ દ્વારા અનુરોધ કરવામાં આવ્યો છે.
કોઈ પણ આપત્તિ કે ભયજનક પરિસ્થિતિ સમયે 181 મહિલા હેલ્પ લાઇનમાં કોલ કરવાથી મદદ મળી શકશે. આ ઉપરાંત આપના સ્માર્ટ મોબાઈલમાં “181 અભયમ” એપ્સ ડાઉનલોડ કરવાથી અભયમ સેવાઓ વધુ ઝડપથી મેળવી શકાશે.